شوخیاں ‘بچپنا

شوخیاں ‘بچپنا

اردو کے ایک بہت اچھے شاعر‘خاکہ نگار اور انشائیہ نگاراکبر حمیدی ہیں۔ہماری گہری دوستی ہے ۔ ایک بار ہم دونوں ڈاکٹر وزیرآغا کے گاؤں وزیر کوٹ ‘اُن سے ملنے کے لئے گئے۔ہم تینوں آغا جی کے کھیتوں کی سیر کر رہے تھے۔آسمان پر چھائے ہوئے بادل گہرے ہوتے جارہے تھے۔آغا جی اپنی فصل کے سلسلے میں فکر مند تھے کہ ابھی دو تین دن تک بارش نہیں ہونی چاہئے۔اکبر حمیدی کہنے لگے:
’’اگر ایسا مسئلہ ہے تو بادلوں کو روک دیتے ہیں۔بارش کرانا اور روکنا کون سے مشکل کام ہیں۔‘‘
ان کی اس بات پر آغا جی ہنسے تو اکبر حمیدی نے کہا
’’آغا صاحب! یہ تو معمولی سی بات ہے۔کیا آپ خود ایسے کام نہیں کر سکتے؟‘‘۔۔۔۔۔۔۔۔
آغا جی نے ویسے ہی ہنستے ہوئے کہا’’اس قِسم کے سارے کام مجھ سے صرف اُس وقت ہوتے ہیں جب میرا معدہ خراب ہوتا ہے۔لیکن آج کل میرا معدہ بالکل ٹھیک ہے۔‘‘
یہ بات صرف آغا جی کی شگفتہ مزاجی کو ظاہر کرتی ہے وگرنہ حقیقت یہ ہے کہ ارتکاز کے بَل پر Rain makingاورRain Breakingکے سچے واقعات مجھے آغا جی نے ہی پڑھائے تھے۔میں نے انہیں ابا جی کا ایسا ایک واقعہ سنایا تھا اور انہوں نے مجھے اس نوعیت کی پوری دنیا کی سیر کرادی۔
یہاں جرمنی میں ایک بار مجھے صوفیانہ خیالات نے پوری طرح اپنی گرفت میں لے لیا۔زندگی کی ہر سرگرمی بے معنی لگ رہی تھی۔جی چاہتا تھاکہ کسی ویرانے میں جا کر اﷲ اﷲ کرتے ہوئے زندگی بسر کروں۔پھر زندگی ہی بے معنی لگنے لگی۔میں نے دنیا کی بے ثباتی پر گفتگو شروع کر دی۔گفتگو گہری اور طویل ہونے لگی تو مبارکہ نے کہا’’ٹھہریں!میں آپ کی شوگر چیک کرتی ہوں‘‘۔۔۔۔جب شوگر چیک کی گئی تو اس کا لیول معمول سے خاصا زیادہ تھا۔شوگر کنٹرول کرنے والی دوا لینے سے حالت بہترہوئی تو زندگی بامعنی اور خوشی سے بھری ہوئی لگنے لگی۔تب میں نے شریر انداز سے مبارکہ سے کہا’’پہلے زمانے میں شوگر کی بیماری کی تشخیص کرنے‘اسے ماپنے اور کنٹرول کرنے کا کچھ پتہ نہ تھا۔شاید اسی وجہ سے بعض شہزادے اپنے محل چھوڑ کر جنگلوں میں چلے گئے۔بُرا ہو اِن جدید سہولیات کا جن کے باعث میں گوتم بُدھ بنتے بنتے رہ گیا‘‘
خانپور میں بنک کے شعبہ سے وابستہ دوستوں میں ارشد خالد‘ظفر اقبال ماچے توڑ اور صفدر صدیق رضی کا ذکر تو ’’میری محبتیں‘‘میں آچکا ہے۔بنک سے وابستہ ایک اور دوست نجم الحسن نجمی تھے۔شاعر تھے اور خوش باش قسم کے انسان تھے۔رحیم یارخاں کے قریب کے کسی گاؤں میں ایک شاعر عاشق قریشی رہتے تھے۔بہت ہی روایتی قسم کے شاعر تھے لیکن ان کا کمال یہ تھا کہ دھڑا دھڑ اپنے شعری مجموعے چھپوا رہے تھے۔ایک بار نجمی نے میری موجودگی میں اُن سے پوچھا کہ یار!تم اتنے مجموعے کیسے چھپواتے ہو؟۔۔۔عاشق قریشی نے بتایا کہ ارد گرد کے دیہاتوں کے بڑے زمینداروں سے پہلے سے طے کرلیتا ہوں۔پھرکتاب کا انتساب دو تین زمینداروں کے نام کرکے ان سے کتاب کی لاگت نکلوا لیتا ہوں اور جو کتاب بِکتی ہے وہ میرا منافع ہوتا ہے۔
’’ہائیں!تمہارے مجموعے بِکتے بھی ہیں؟‘‘نجمی نے مضحکہ اُڑانے والے انداز سے پوچھا۔
اس پر عاشق قریشی نے بڑی ہی صاف گوئی سے بتایا کہ چھ سات تھانے والوں سے اس کی دوستی ہے۔وہ سب اس سے پچاس‘پچاس جِلدیں لے لیتے ہیں اور تھانے آنے والوں کو تھوپ دیتے ہیں۔جو رقم ملتی ہے ‘آدھی آدھی کرلیتے ہیں۔
تب نجم الحسن نجمی نے کہا کہ یہ کرامت تو سُنی تھی کہ’’تُوں چوراں نُوں قطب بنانویں‘‘(تم نے اپنی نظر سے چوروں کو بھی قطب بنادیا)لیکن ابے سالے تُونے تو کمال کردیا ’’تُوں چوراں نُوں کتب پڑھانویں‘‘(تم نے چوروں کو مطالعۂ کتب پر لگا دیا ہے)۔
میری دُور کی نظر کمزور ہے۔پاکستان میں میری عینک کا نمبر -3.75تھا۔ایبٹ آباد میں یہ-3.50ہوگیا تھا اور جرمنی آکر چیک کرایا تو عینک کا نمبر-3.25ہو گیا۔تب میں نے بعض قریبی عزیزوں سے بات کرتے ہوئے کہا ہمیں ہمارے بزرگوں نے زندگی بھر غضِّ بصر کی تلقین کر کرکے نظر کمزورکرادی۔لیکن ایبٹ آباد میں لیڈی ٹیچرز کی رفاقت سے اور یہاں جرمنی کے کھلے ماحول سے آنکھوں کا درست استعمال شروع کیا تو ان کی کم ہوتی ہوئی روشنی بحال ہونے لگی ہے۔ویسے یہ بات شوخی کی حد تک ہے وگرنہ ڈاکٹر نے میرے استفسار پر بتایا تھا کہ ایک عمر کے بعد دور کی نظر کا نمبر تھوڑا سا کم ہو جاتا ہے اور اس کے نتیجہ میں نزدیک کی نظر پر اثر پڑتا ہے۔یہ اور بات کہ میری دور کی نظر پہلے سے بہتر ہونے کے ساتھ نزدیک کی نظر بھی خدا کے فضل سے ابھی تک بالکل ٹھیک ہے۔
بچپن اور لڑکپن میں میرا سب سے پسندیدہ کھیل ’’گُلّی ڈنڈا‘‘ تھا ۔ گرمیوں کی چلچلاتی دھوپ میں بھی یہ کھیل کھیلنے کا اپنا ہی مزہ تھا۔تھوڑی سی کرکٹ بھی کھیلے تھے لیکن ہماری کرکٹ کے قواعد ہمارے اپنے تھے۔کپڑے کی کترنوں کو مِلا جُلا کر گیند تیار کی جاتی۔اسے پنجابی میں’’کھِدُّ و‘‘کہتے ہیں۔تختی سے بیٹ کا کام لیتے۔وکٹوں کی جگہ اینٹیں سجائی جاتیں تاکہ وکٹ گرنے کی نوبت ہی نہ آئے۔ بیٹس مین شاٹ کھیلنے کے بعد جتنی چاہے رنز بنا سکتا تھا۔’’کھِدُّ و‘‘کبھی قریبی جھاڑیوں میں گُم ہو جاتا تو بیٹس مین کے وارے نیارے ہو جاتے۔ایسے ہی ایک موقعہ پر میں نے مسلسل پندرہ رنز بنائے تھے۔پھر تھک گیا تھا اس لئے مزید رنز نہیں بنائے۔وگرنہ ایک شاٹ پر سنچری ہو سکتی تھی کیونکہ گیند جھاڑیوں سے ملی ہی نہیں تھی۔
رحیم یارخاں میں ہمارے قیام کے زمانے میں ایک بار میرے ننھال سے بے جی‘خالہ حبیبہ‘ماموں سمیع‘ماموں صادق ‘ماموں کوثر‘ ماموں ناصر ۔۔ ۔ بہت سارے عزیز آئے ہوئے تھے۔تب اباجی اور چاروں ماموؤں نے ایک تفریحی گراؤنڈ میں دوڑکا مقابلہ کیا۔یہ مقابلہ ابا جی نے جیت لیا تھا۔
جن دنوں میں بے جی(نانی جان)کے ساتھ سارے مذکورہ عزیز آئے ہوئے تھے‘انہیں دنوں ایک نیم دیوانے قسم کے میاں کالے خاں بھی آوارد ہوئے۔یہ ہمارے ننھال کے جاننے والے تھے۔امی جی کودعا یا آشیر واد دینے کے لئے آئے۔ایک بگل سا ان کے ہاتھ میں ہوتا تھا۔اپنا نام اس بگل پر’’کالے خاں ۔۔۔امام مہدی‘‘لکھوا رکھا تھا۔لیکن بیعت کسی کی نہیں لی۔ان کے بارے میں پتہ چلا کہ پیِروں کے مزاروں پر چڑھائی جانے والی چادریں اتار کر لے جاتے۔کوئی روکتا تو برہم ہو کر کہتے زندوں کو کپڑا ملتا نہیں اور تم مزاروں پر چڑھاتے پھرتے ہو۔مزاروں والے انہیں بھی کوئی پہنچا ہوا سمجھ کر چُپ کر جاتے۔ہمارے ہاں ایک دن رہے۔صبح اُٹھتے ہی کہنے لگے مجھے خدا نے کہا ہے:قالوبلیٰ قد جاء نا۔پھر اس کا پنجابی میں ترجمہ بھی کردیا ۔کالے خاں توں کدوں جانا ایں؟(کالے خاں!تم نے کب یہاں سے جانا ہے؟)اور پھر سب کو دعا دیتے ہوئے فقیرانہ شان کے ساتھ رخصت ہو گئے۔جاتے ہوئے بگل بھی بجاتے جاتے تھے۔
قرآنی الفاظ کے پنجابی استعمال کی ایک دلچسپ بات سید عطا ء اﷲ شاہ بخاری کے لڑکپن سے متعلق ہے۔کہیں پڑھا تھا کہ وہ لڑکپن میں امرتسر کے کسی معروف حکیم صاحب کے شاگرد بنے تھے۔حکیم صاحب کے مطب کے سامنے ہی ان کا گھر تھا۔گھر والے حکیم صاحب کے لئے(غالباََ حقہ کے لئے)دہکتے کوئلوں کا تسلا تیار کردیتے تھے اور کوئی شاگرد آکر وہ تسلا لے جاتاتھا۔ سید عطا ء اﷲ شاہ بخاری کو جب پہلی بار تسلا لانے کے لئے بھیجا گیا تو انہوں نے کسی کپڑے کے بغیر انگلیوں سے تسلے کے کنارے پکڑے ۔ظاہر ہے کہ لوہے کا تسلا خاصا گرم تھا۔ شاہ صاحب جلدی سے سڑک پار کرکے مطب کے تھڑے پر ہی تسلا رکھ کر کہنے لگے’’استاد جی! تصلیٰ نار حامیہ۔
ایسے ہی حکیم نورالدین صاحب کا یہ قصہ بھی مشہور ہے ۔کسی نے ان سے قولو قولاََ سدیدا کا مطلب پوچھا تو انہوں نے رواں پنجابی میں اسے یوں واضح کردیا۔قولو۔۔۔کہہ دے‘ قولاََ۔۔۔گَل (بات)‘سدیدا۔۔۔سیدھی سیدھی۔
کالے خاں کی بات سے بات کہاں جاپہنچی۔بات ہو رہی تھی ابا جی اور ماموؤں کی ریس کی۔ایک اور موقعہ پر ابا جی‘ماموں کوثر‘ماموں صادق ‘ماموں سمیع اور محلے کے بہت سارے احباب شامل ہوئے ۔فٹ بال میچ کھیلا گیا۔بچوں کو بھی ٹیموں میں شامل کیا گیا۔میں ابا جی کی ٹیم میں تھا۔مجھے ابھی کھیلنا تو آتا نہیں آتا تھا‘پھر بڑوں کے سامنے ویسے بھی کیا کھیل پاتا۔اس کے باوجود ابا جی باآواز بلند ’’شاباش۔۔۔حیدر شاباش۔۔۔‘‘کہہ کر میری ہمت بندھاتے رہے۔کک وہ خود مارتے اور مجھے شاباش دیتے جاتے۔اسی دوران مجھے پیشاب کی حاجت محسوس ہوئی۔میں گراؤنڈ سے باہر کسی مناسب جگہ پر پیشاب کررہا تھا۔تب بھی ابا جی کی آواز آئی:’’شاباش۔۔حیدر شاباش‘‘یہ ایسی سچویشن تھی کہ دونوں ٹیمیں دیر تک ہنستی رہیں۔
آپی مجھ سے ایک سال بڑی تھی۔میرے بعد پھر ایک بہن (زبیدہ)پیدا ہوئی۔یوں میں ابتدائی بچپن میں دو بہنوں کا اکلوتا بھائی تھا۔(ویسے ہم پانچ بھائی اور پانچ بہنیں‘کُل دس بہن بھائی تھے۔ایک بہن شمسہ فوت ہوگئی تھی)محلے میں بچیوں کی تعدادزیادہ تھی۔چنانچہ میرے بچپن کی ابتدائی گیمز لڑکوں والی کم اور لڑکیوں والی زیادہ تھیں۔رحیم یارخاں کے ماحول میں تب یہ گیمز مقبول تھیں۔’’کوکلا چھپا کے جمعرات آئی اے‘‘۔’’مائی نی مائی تنور تپیا کے نائیں؟‘‘۔’’ککلی کلیر دی‘‘اور’’لکن میٹی‘‘۔
ذرا بڑے ہوئے تو بچیوں کی گیمز کی جگہ بچوں کی گیمز کا پتہ چلا۔’’پٹھو گرم‘‘۔’’چکّر بتی‘‘۔’’مِیرو ڈبہ‘‘اور’’گلّی ڈنڈا‘‘۔۔۔’’چکر بتی‘‘اور ’’میرو ڈبہ‘‘ملتی جلتی گیمز تھیں۔آجکل مغرب میں جو ’’بیس بال‘‘گیم مقبول ہے‘اسے’’چکر بتی ‘‘اور’’میرو ڈبہ‘‘کی بدلی ہوئی صورت سمجھیں۔’’پٹھو گرم‘‘میں نے بہت کھیلا لیکن سب سے زیادہ مزہ ’’گلی ڈنڈا‘‘کے کھیل میں آیا۔ایک بار ہم سارے عزیزوں نے یہاں جرمنی کے ایک پارک میں’’کوکلا‘‘کھیلا تو بہت مزہ آیا۔بعد میں ’’گلی ڈنڈا‘‘کھیلنے کا طے کیا تھالیکن ابھی تک پروگرام نہیں بن سکا۔
جب ہم لوگ خانپور شفٹ ہوئے تب بابا جی نے مجھے پہلوانی کی طرف راغب کرنے کی کوشش کی ۔پہلوان تو میں کیا بنتا البتہ کبڈی کے دو تین داؤ بابا جی سے ضرور سیکھ لئے۔لیکن مجھے یہ کھیل اچھا نہیں لگا۔سچی بات یہ ہے کہ میں جسمانی لڑائی لڑنے کا اہل ہی نہیں ہوں ذہنی لڑائی اور ادب کے دائرے کے اندر رہتے ہوئے ذہنی لڑائی لڑنے میں مجھے ہمیشہ مزہ آیا ہے۔اسی لئے ادبی پنگوں میں الجھا رہتا ہوں۔
میرے نزدیک ادبی پنگے تہذیب کے دائرے کے اندر ہوتے ہیں۔ بعض ادیبوں؟ میں جوگمنام’’گشتی مراسلہ بازی‘‘کی ’’خوبی‘‘ پائی جاتی ہے وہ ادب کے دائرے سے ہی نہیں ’’ادنیٰ درجہ کی تہذیب ‘‘سے بھی گری ہوئی حرکت ہے۔ایسے لوگ نہ ادیب ہیں نہ ادب سے ان کا کوئی جائز تعلق ہے۔یہ صرف جعلی اور چور قسم کے لوگ ہیں جو ادب کی دنیا میں گھُس آئے ہیں اور اپنے طرزِ عمل سے ادب میں ’’طوائف الملوکی‘‘پیدا کررہے ہیں۔سو ایسے لوگوں کو میں اپنا حریف ہی نہیں سمجھتا۔ہاں ا دب اور تہذیب کے دائرے میں رہ کر ادبی پنگا کرنا ایک اور چیز ہے اور ایسے تمام ذہین ادیب دوستوں سے پنگا کرنے میں بھی مزہ آتا ہے۔
پنگوں کے لفظ سے’’پِینگ‘‘یاد آگئی۔درختوں پر ’’پینگ‘‘ (جھولا) ڈال کرپینگ چڑھانے کا بھی ایک وقت تک شوق رہا لیکن ایک گیم ایسی ہے جو بچپن سے لے کر جوانی تک ‘شادی کے بعد بھی دیر تک کھیلی ہے۔یہ گیم ’’اشٹاپُو‘‘ہے۔چھ خانے بنا کر‘ایک ٹھیکری کے ساتھ وہ خانے ایک ٹانگ کے بَل پر پُگانے ہوتے تھے۔دواور گیمز بھی یاد آگئیں۔۔’’ماماں جمال خاں‘‘ اور’’ہرا سمندر‘‘۔۔۔یہ بھی بچپن کے مزیدار کھیل تھے۔
اِن ڈور گیمز میں ’’کیرم‘‘بھی تھوڑا سا کھیلا ہوں لیکن ’’لوڈو‘‘۔’’بارہ ٹہنی‘‘ اور ’’نوٹہنی‘‘(جسے ہماری سرائیکی میں ’’نَوں تَرین‘‘کہتے ہیں)میری پسندیدہ گیمز ر ہی ہیں۔اب بھی کبھی کبھار کھیل لیتا ہوں۔ ’’کانچ کی گولیاں‘‘۔’’اخروٹ‘‘اور’’تاش کے پتے ‘‘ ان تین گیمز سے بچپن میں ہی اتنا ڈرا دیا گیاتھا کہ یہ بہت بُری گیمز لگتی تھیں۔’’بہت ہی بُرے بچے ایسی گیمز کھیلتے ہیں‘‘۔۔۔۔۔کانچ کی گو لیاں اور اخروٹ تو کبھی نہیں کھیلا البتہ ایک بار چھوٹے بھائی اکبر نے تاش کے پتے کھیلنے کے گُر سکھا دئیے۔دوتین برس یہ گیم خوب کھیلی لیکن پھر مجھے محسوس ہوا کہ یہ بہت ہی واہیات گیم ہے۔اس میں ہارنے والا‘جیتنے کی اُمید لئے کھیلنے پر تُلا رہتا ہے اور جیتنے والا جیت کے نشے میں مزید کھیلتا چلا جاتا ہے۔یوں ساری ساری رات اس کھیل میں گزر جاتی ہے۔مجھے لگا کہ یہ گیم وقت کا ضیاع ہے۔چنانچہ پھر طبیعت خود ہی اس سے اُچاٹ ہو گئی اور اب میرے سامنے اس کھیل کی رونق بھی لگی ہوئی ہو تب بھی کھیلنے کو جی نہیں کرتا۔
لڑکپن کا ایک کھیل ۔۔۔۔جسے میں لکھنے سے پہلے ہچکچایا ہوں اور اب لکھنے لگا ہوں تو میرے چہرے پر خفیف سی شرمندگی والی مسکراہٹ ہے۔میں نے اپنی بہنوں کے ساتھ مل کر گڈی‘گڈے کے بیاہ کا کھیل بھی بہت کھیلا ہے۔اس میں بہنوں کی سہیلیاں بھی شامل ہوتی تھیں۔مہندی کی رسم سے لے کر رخصتی تک کی تقریب کی پوری پوری نقل کرتے۔
ایک بار میں رحیم یارخاں گیا ۔اپنے پرانے محلے میں گیا تو گلی وہی تھی لیکن گلی کے بیشتر مکان پختہ‘قد آور اور خوبصورت بن چکے تھے جو مکینوں کی خوشحالی کو ظاہر کر رہے تھے۔بُوا زیبُو کا گھر البتہ ویسے کا ویسا ہی کچا کوٹھا اور جھونپڑی نما تھا۔مجھے اس گھرکوجوں کا توں دیکھ کر اس گھر سے جُڑی ہوئی ساری یادیں مسکراتی‘گاتی اور اچھلتی‘کودتی دکھائی دینے لگیں ۔ہر منظر‘ہر یاد‘اس گھر کی چیزوں سے دِکھنے لگی تو میں اپنی خوشی کو نہ چھپا سکا اور بے اختیارانہ میں نے کہہ دیا کہ اس گھر کو جوں کا توں دیکھ کر مجھے بیحدخوشی ہوئی ہے۔تب بوا زیبو کی بڑی بہو نے دُکھی لہجے میں کہا:اگر اس گھر کو ایسے دیکھ کر آپ خوش ہوئے ہیں تو ہمیں بھی خوشی ہے ورنہ ہم تو یہی سوچتے رہتے ہیں کہ کب حالات بہتر ہوں اور گھر کو پکا کرالیں۔بُوا زیبو کی بہو کا وہ دُکھی لہجہ مجھے ابھی تک شرمندہ کرتا رہتا ہے۔
بالکل ابتدائی بچپن میں‘دوسری اور تیسری جماعت کے دورانیہ میں ہمارے دوستوں کا ایک حلقہ سا بن گیا تھا۔اس میں اکرم‘غوری‘افضل‘نظام دین اور امداد حسین کے نام مجھے ابھی تک یاد ہیں۔لیکن خانپور آنے کے بعد پھر ان میں سے کسی دوست کا کوئی اتہ پتہ نہ چل سکا۔میرے ذہن سے باقی چہرے تو دھندلا گئے لیکن اکرم کا چہرہ ہمیشہ واضح رہا۔لگ بھگ بیس ‘بائیس سال کے بعد کی بات ہے۔تب ہماری شوگر مل کی حبیب بنک برانچ کے مینجر ظفر اقبال ماچے توڑتھے۔ ایک دن انہوں نے مجھے کہا کہ رحیم یارخاں سے ایک نئے آفیسر مرزا افضل بیگ آئے ہیں ۔ایک دفعہ دورانِ گفتگو آپ کا ذکر آیا توانہوں نے اپنے بچپن کے ابتدائی دوستوں کے گروپ میں حیدر نامی دوست کا ذکر کیاجو یکایک لاپتہ ہو گیاتھا۔مجھے یہ جان کربیحد خوشی ہوئی ۔
افضل سے ملاقات ہوئی‘کچھ یاد نہیں آیا۔چہرے پہچان میں نہیں آئے۔البتہ واقعات کے بیان میں ہم آہنگی تھی۔ آخر افضل ایک دن اُس زمانے کی ایک گروپ تصویر لے کرآیا۔میں نے اکرم اور غوری کو فوراََ پہچان لیا۔تب افضل نے بتایا کہ جسے آپ اکرم کہہ رہے ہیں ‘یہ میں ہوں۔اس سے میں نے اندازہ کیا کہ نام کا ادل بدل بے شک ہوا لیکن میرا ایک اچھا دوست یہی تھا۔
’’لیکن یہ(اکرم یا افضل جو بھی ہے)تو بچپن میں بہت دُبلا پتلا اور لمبے قد کا تھا؟‘‘
میرے اس تذبذب پر افضل نے بتایا کہ’’دسویں جماعت کے بعد اس کا قد بڑھنا بند ہو گیا تھا‘‘۔
پھر میں نے اکرم‘غوری اور امداد کے بارے میں پوچھا تو افضل نے صرف غوری کے بارے میں بتایا کہ اچھی پوزیشن میں ہے۔اکرم کے بارے میں لہجہ درست نہ تھا اور امداد حسین (جو خوشخط تختی لکھنے کے باعث کلاس میں مشہور تھا)کے بارے میں اتنا بتایا کہ وہ کاتب بن گیا ہے۔میں اس کے تحقیر آمیز انداز سے یہی گمان کئے رہا کہ افضل کی ان دوستوں کے ساتھ اَن بَن ہوگی اس لئے ان کا ذکر سرسری اور اس انداز میں کر رہا ہے۔میں بچپن کی گمشدہ دوستیوں کے ملنے پر نہ صرف خوش تھا بلکہ خاصا پُر جوش بھی تھا۔لیکن ایک دو دن کے اندر میں نے افضل کے رویے میں سرد مہری سی محسوس کی تو میرا اپنا میٹر گھوم گیا۔وہ خود کو سماجی لحاظ سے افضل سمجھ رہا تھا جبکہ میں فقیری میں بادشاہی اوربادشاہی میں فقیری کرنے والا بندہ ہوں۔چنانچہ پھر میں نے افضل کو ایسے نظر انداز کردیاکہ شاید وہ خود بھی حیران ہوا ہوگا۔
ایک بار پھر میں رحیم یارخاں گیا تو وہاں ہمارا گھر اپنی اصلی حالت میں موجود ہونے کے باوجود اتنا خستہ اور جگہ جگہ سے ٹوٹ چکا تھا کہ میں کمروں میں جانے کی ہمت نہ کر سکا۔ایسے لگتا تھا جیسے کسی وقت بھی سارا گھر گرپڑے گا۔
بوا زیبو کے گھر‘افضل سے ملاقات کے تجربہ اور اپنے پرانے گرتے ہوئے گھر کو دیکھنے کے بعد میں اس نتیجہ پر پہنچا کہ یادوں کاتعلق گزرے ہوئے واقعات اور مقامات سے منسلک ہونے کے باوجود ہمارے اپنے اندرکی دنیا سے ہوتا ہے۔باہر کی دنیا میں بہت کچھ تبدیل ہو چکا ہوتا ہے لیکن ہمارے اندر کی دنیا میں سارے واقعات‘سارے مقامات ویسے کے ویسے ہی آباد ہوتے ہیں۔
یہ ہماری یادوں کی دنیا‘ہمارے اندر کی دنیا بھی کتنی عجیب ہے!

***